Візіт Алеся Бяляцкага запланаваны ў межах Касцюшкаўскага форуму, які пройдзе ў сераду, 3 чэрвеня, у 18:00 у Еўрапейскім цэнтры салідарнасці (ECS).
Падчас мерапрыемства Алесь Бяляцкі будзе ўганараваны Прэміяй салідарнасці і правоў чалавека Еўрапейскага цэнтра салідарнасці. Гэтая ганаровая ўзнагарода прысуджаецца людзям, якія ўнеслі выключны ўклад у абарону правоў чалавека — як у грамадзянскай супольнасці, так і ў сферах культуры, навукі і адукацыі. Адзначаючы беларускага праваабаронцу, ужо лаўрэата Нобелеўскай прэміі міру, арганізатары падкрэсліваюць яго ролю ў прасоўванні гістарычных зменаў у галіне правоў чалавека.
Асобнай падзеяй для беларускай супольнасці і ўсіх зацікаўленых стане адкрытая сустрэча з нобелеўскім лаўрэатам, якая адбудзецца ў сераду, 3 чэрвеня, у 18:00 у Еўрапейскім цэнтры салідарнасці (ECS), у шматфункцыянальнай зале на першым паверсе. Сустрэча пройдзе на беларускай мове з перакладам на польскую. Уваход вольны. Падчас сустрэчы Алесь Бяляцкі падзеліцца сваім досведам і поглядамі на актуальную сітуацыю з правамі чалавека.
