Урад рыхтуе значныя змены ў сістэме выплат 800+. З 2027 года бацькам больш не прыйдзецца штогод падаваць заяўкі — новыя правілы павінны спрасціць працэдуру і забяспечыць бесперапыннасць выплат.
Рэформа праграмы «Сям’я 800+» стане прыкметным палягчэннем для бацькоў: знікне неабходнасць рэгулярна падаваць дакументы, звяртацца ў ZUS і сачыць за тэрмінамі падачы заяў. Змены рыхтуюцца як адказ на запыты сем’яў і ў рамках далейшай лічбавізацыі дзяржаўных паслуг.
Як паведамляе «Gazeta Prawna», з 2027 года заяўку на дапамогу трэба будзе падаваць толькі адзін раз — пры нараджэнні дзіцяці або вяртанні з-за мяжы. У далейшым ZUS будзе аўтаматычна падаўжаць выплаты на аснове наяўных дадзеных.
Аўтаматычнае падаўжэнне павінна знізіць рызыку страты дапамогі з-за прапушчаных тэрмінаў або фармальных памылак, а таксама скараціць бюракратычную нагрузку і спрасціць узаемадзеянне з ведамствам.
Пры гэтым сістэма будзе працаваць пры ўмове, што сямейныя дадзеныя застаюцца актуальнымі. Бацькі захаваюць магчымасць уносіць змены ў асабістую інфармацыю, а пры адсутнасці карэктоўак выплаты будуць падаўжацца аўтаматычна.
Цяпер заяўку неабходна падаваць штогод, інакш права на дапамогу можа быць страчана. Пасля рэформы дастаткова будзе адной заяўкі на дзіця — далейшае адміністрацыйнае кіраванне возьме на сябе ZUS, забяспечваючы бесперапыннасць выплат і зніжаючы рызыку памылак.
Па дадзеных «Gazeta Prawna», урад плануе прыняць законапраект у другім квартале 2026 года. Новыя правілы павінны ўступіць у сілу з перыяду выплат 2027/2028, то бок з 1 чэрвеня 2027 года. ZUS ужо рыхтуе тэхнічную адаптацыю сістэм.
Паралельна грамадства застаецца падзелена ў ацэнцы праграмы 800+. Апытанне, праведзенае па заказу «Super Express» інстытутам Pollster, паказала розныя погляды на магчымую прывязку дапамогі да працоўнай актыўнасці бацькоў.
44% респондэнтаў лічаць, што пасля страты працы выплаты павінны захоўвацца, але пры ўмове рэгістрацыі ў службе занятасці. 32% выступаюць за безумоўнае прадастаўленне 800+ ўсім бацькам. 13% падтрымліваюць поўнае спыненне выплат пасля страты працы, а 12% не вызначыліся з меркаваннем.
