Галоўная медыцынская палата Польшчы з 1 мая анулявала ўмоўнае права на працу 146 лекараў з краін за межамі ЕС. У асноўным гэта медыкі з Украіны, якія не прадставілі сертыфікат ведання польскай мовы на ўзроўні мінімум B1.
Старшыня Галоўнай медыцынскай палаты (Naczelna Rada Lekarska) Лукаш Янкоўскі заявіў, што лекар, які не валодае польскай мовай, не павінен працаваць у Польшчы: «Калі чалавек не гаворыць па-польску, ён не павінен працаваць лекарам».
Паводле яго слоў, праца такіх спецыялістаў у бальніцах можа быць небяспечнай для пацыентаў.
З 1 мая страцілі права на працу тыя замежныя лекары, якія не пацвердзілі веданне польскай мовы
«Мы ўжо анулявалі 146 дазволаў, але ў цэлым працэдура тычыцца некалькіх сотняў чалавек», — сказаў Янкоўскі.
Па ацэнках Янкоўскага, у Польшчы працуе каля 3 тысяч украінскіх дактароў. Прыблізна тысяча з іх да гэтага часу не прадставіла сертыфікат узроўню B1.
Магчымыя змены закона
Міністэрства аховы здароўя плануе змены, якія могуць дазволіць лекарам без польскай мовы працаваць яшчэ адзін год. Янкоўскі назваў гэтае рашэнне памылковым і прыкметай праблем у сістэме аховы здароўя.
Ён таксама адзначыў, што такіх дактароў часта наймаюць у прыёмныя аддзяленні і бальніцы ў рэгіёнах, дзе не хапае персаналу. Аднак, па яго словах, медыцынская палата выступае супраць такой практыкі.
Мова — абавязковая ўмова
Галоўная медыцынская палата Польшчы дамагалася абавязковага пацверджання ведання мовы для дактароў.
Раней патрабаванні былі зніжаны да ўзроўню B1 — які Янкоўскі назваў «турыстычным» і занадта нізкім па еўрапейскіх стандартах
Паводле слоў кіраўніка Галоўнай медыцынскай палаты, лекары без ведання польскай мовы могуць негатыўна ўплываць на ўспрыманне ўсёй прафесіі: «Яны фармуюць меркаванне аб усім медыцынскім супольстве».
Што далей для ўкраінскіх медыкаў
Умоўнае права на працу дзейнічае толькі для працы ў канкрэтнай бальніцы і не дае права весці прыватную практыку
Гэтыя правілы былі ўведзены часова з-за вайны ва Украіне.
Цяпер новыя заяўкі на ўмоўны дазвол ужо не прымаюцца, а раней выдадзеныя дазволы будуць дзейнічаць максімум да восені 2029 года.
Каб працягнуць працу ў Польшчы, лекары з Украіны павінны будуць:
- прайсці стажыроўку
- здаць экзамен LEK
- пацвердзіць дыплом праз настрыфікацыю
Крыніца: https://wydarzenia.interia.pl/kraj/news-kilkuset-lekarzy-z-ukrainy-straci-prace-jestesmy-w-trakcie-p,nId,23475406
