Улады Сопота заявілі, што будуць уносіць у польскія рэестры шлюбы аднаполых пар, заключаныя за мяжой. Горад чакае толькі тэхнічнай адаптацыі сістэмы пад патрабаванні Міністэрства лічбавізацыі.
Як падкрэслівае мэр Сопота Магдалена Чаржыньская-Яхім, як толькі з’явіцца магчымасць сістэмнай рэгістрацыі такіх шлюбаў, працэдура будзе запушчана.
— Формальных заяў пакуль няма, але звароты ад зацікаўленых асоб ужо паступалі. Мы разглядалі такую магчымасць яшчэ год або два назад, аднак да гэтага часу не было паўнавартаснага сістэмнага рашэння, якое дазволіла б рэгістраваць такія шлюбы ў рэестры, — адзначае яна.
Раней польскія органы адмаўлялі ў транскрыпцыі аднаполых шлюбаў, спасылаючыся на сямейнае заканадаўства. Змены сталі магчымымі пасля рашэнняў Суда ЕС і Вышэйшага адміністрацыйнага суда.
